Г1алг1ай Мехка-даь Евкурнаькъан Баматгире Юнус-Бека кхайкарал

Хьамсара мехкахой, х1ей бусалба нах, тахан вайна хьат1аенар еза ха я - сийдола параза мархий бутт. Дала из кхабар бусалба наха параз деш, къуръан чу амар даьд: «шух бутт б1аргабайначо из кхоабалба»,аьнна. Вай Элчано, Даьла солот-салам хилда цунна, ший асхьабашка кхаъ боаккхаш оалаш хиннад: «мархий бутт хьат1акхаьчаб шоана, беркате бутт, цу чухь ялсмален на1араш хьаелл, жожаг1атен на1араш д1акъовл, шайт1аш д1адехк, цу чухь бийса я эзар беттал дикаг1а… .  Дала ший къахетамца вайна бенна бутт ба из. Вай из пайда ца эцаш д1абахийта йиш яц! Дика мел долча х1аман на1араш хьайийлла, во мел долча х1аман на1араш д1акъайла шайт1аш д1адийхка хилча, вайна дика хила хала дац. Вай, массадолча дикача х1аман т1акхувш хила деза. Са дехар хургдар  мехкахошка, боккъала, шоашта юкъе дежа х1ама, дов дале а эг1азло яле а из д1адаккхара, цунгахьа маслахьат дара сихо е, аьнна. 

Хьамсара мехкахой, бусалба вежарий йижарий! Ер саг1ан а сабара а бутт ба, ер къахьегама а толама а бутт ба, ер мискача наха г1о ду а мецавар вузаву а бутт ба, ер гаргалол хотта а къинт1ера воала а бутт ба, ер маслахьата а машара а бутт ба! Ма хулла цу дикача, хозача г1улакхашта т1акхе хьажа деза вай, къаьстта укх безача мархий бетта! 

  Даьла дикаца тахан вай мохк хоза дег1абоаг1аш латт. Хьалъеш латт дукха социальни г1ишлонаш: больницеш, садикаш, ишколаш, университеташ, хьужаренаш, маьждигаш. 1одохкаш латт керда наькъаш, тоадеш латт къаьнадараш. Из деррига Дала вайх баь къахетам ба. Тахан вай доаккхал ду Дала воашта яннача парг1атонах. Вайга дин парг1ато я, вай дийлла латташ маьждигаш да, цу чу деш 1ибадат да. Иштта исламски университеташ, хужаренаш я. Цу чу вай дезалашта хоза хьехаш 1илма да. Геттара лерх1аме я вай ишколашка дина бовхамаш яха урок. Х1аьта вай

хам беш хила деза воашка кхаьчача диках. Х1ана аьлча: «оаш хам бой Аз Сай диках совдоахаргда шо, хам ца бой Са 1азап ч1оаг1а да» йоах Дала.

Хьамсара мехкахой, бусалба вежарий йижарий! Дала, 1азза ва жалла, воашка кхаьчача дикан хам бе хьаькъал лолда вайна. Х1аьта, ер сийдола параз мархий бутт кхаба беззача тайпа кхаба а лерх1а беззача тейпа лерх1а а ийман лолда вайна!